बाढि आ काव्य – कमला नदीक ओ जबानीकाल

साहित्य

– सत्य नारायण झा

हमरा गामक पूब कमलाक धार छैक । आब त एहि धारक कोनो अस्तित्व नहि छैक मुदा हम जखन नेना रही तखन एहि धारक बाढ़ि सँ लोक त्रस्त रहैत छल । ओ भीषण क्षण एखनो केखनो कय मोन परि जाइत अछि त देह सिहरि जाइत अछि । चारि मास लोक एहि बाढ़ि सँ आक्रान्त रहैत छल । मुदा 1954-55 मे धार बलान मे मिलि कय एखन झंझारपुर दय बहैत अछि । हमरा गामक धार मे लोक सभ कतेको घर बना कय रहैत अछि । ओही धार कमला पर हम ई कविता 2011 मे लिखल आओर विदेह मे इ छपल सेहो छैक ।

मरलाहा धार

धारक कछेर मे बैसल टुकुर टुकुर तकइत छी,
तकइ छी एहि धार क’, तकइ छी ओहि पार कs
ई यैह ओ धार छैक,
सभक करेज पर छुरी चलबैत छलै
जवानों क’ दिल धरकबैत छलै ।
एकर जखन जवानी रहैक,
कतेक उफनैत छलै, कतेक फनकैत छलै
जेना एकरा आगा कियो नहि छै ?
एकरा डरे कियो सुतैत नहि छल
ई कखन की करत, एकर कोनो ठेकान नहि ।
गामक गाम सुन्न क’ देलक,
पोखरि, इनार, गाछी विरछी सभ नाश केलक,
ई गामक जेठरैयत छल, गामक पटवारी छल
एकर आगमने सुनि लोक कपैत छल ।
बाप रे फेर डकुबा एतैक,
एहिबेर नहि जानि की करतैक ?
समूचा गाम क’ सुड्डाह केलक,
घर, आँगन, दलान तोरलक ।
धीयापूता कलोल करैत छल,
भूखे पेटकान धेने, बेजान रहैत छल ।
मुदा, एहि डकुबा कए कनेको दया नहि विवेक नहि,
निष्ठुर हिरदय, कर्कश स्वर,
अगिया बेताल छल, ई धारे नहि, महाकाल छल ।
कतेक कए मांग पोछलक, कतेक कए लहठी तोरलक।
कतेक कए कोखि उजारलक,
ई राक्षसे नहि, पैघ भक्षक छल ।
एकर प्रवाह तेज होयते, लोक सिहरि जाइ छल,
केखनो सीधा दौडइत छल, पाछू घुमैत छल,
चक्कर कटैत छल,
विकराले नहि, भयानक लगैत छल ।
समय चक्र उनटलइ, एकरो अंत एलइ
एकरा बुझल नहि छलैक, एकरो काल घेरतइक,
इहो एक दिन निष्प्राण हेतैक ।
एकरा करेज पर लोक घर बान्हि देलकै,
ई निर्जीव भेल परल, नंगटे ओंघरायल छैक,
जतेक पाप केलक, सभक फल पेलक ।
एकर हाल भिखमंगनी जकाँ छैक,
एकरा देह पर गुदरी लादल छैक,
हुक हुकी छैक, मगर टुकुर टुकुर तकइ छैक हमरे जकाँ,
जेना हम तकइ छी एखन एकरे जकाँ!

पूर्वक लेख
बादक लेख

Leave a Reply

Your email address will not be published. Required fields are marked *

1 + 6 =