विधवा नारी केर विभिन्न अधिकार पर बंधनक औचित्य की?

बाबा केर गेलाक बाद दादीक जिन्दगी सँ सब रंग हँटिकय मात्र उज्जर वस्त्र रहि गेल छलन्हि। ओ हमेशा उजरे रंगक साड़ी पहिरैत छलीह। कखनहुँ नीला त कखनहुँ हरियर कोर वला साड़ी…! मुदा जेना-जेना हम सब पैघ होवय लगलहुँ, हमरा सभ केँ ई बात बहुत अखरय लागल छल। बाबूजी केँ सेहो नहि नीक लगैन परंच ओ धाखे दादी केँ किछु कहथिन नहि। हम स्वभावहि सँ परंपरा-विरोधी रहलहुँ। एहि बात सँ घर मे सब परेशान रहथि सिवाये बाबूजी केर। सब साल जेकाँ ओहि साल सेहो दुर्गा पूजा वास्ते सभक कपड़ा कीना रहल छल। दादी लेल जखन साड़ी पसीन करय लगलाह बाबूजी तऽ हम सब उजरे रंग पर चौड़गर पारि वला साड़ी पसीन केलहुँ, सेहो लाल रंग सँ मिलैत पारि वला। ओ लय केँ जखन हमरा लोकनि दादी केँ देखेलियनि तऽ ओ कहली जे हम आब ई सब कोना पहिरब…, मुदा हमहूँ सब बाबूजी केँ मना लेने रही दादी केँ मनेबाक लेल, त ओ कहलखिन जे “मां, कियैक नहि पहिरब? बच्चो सभ केर मोन छैक आ हमरो नीक लागत।” दादी बाबूजीक बात कखनहुँ नहि कटैत छलीह। ओ कहलखिन जे ठीक अछि बौआ, अहाँ केँ मोन अछि तखन ठीक छैक। हमर दादीक जिन्दगी मे ओहि साल सँ हम सब रंग अननाइ शुरू केलउं चाहे कनिये पर शुरुआत भेल। ओहि साल हमर सभक नानाजी सेहो आयल छलाह हमरा सभ लग। ओ बहुत कट्टर पुरान सोचक लोक छलाह। हमर दादी केर ओहि साड़ी मे देखिकय कहला “विधवा केँ रंगीन परिधान नहि पहिरेबाक चाही।” लेकिन हमर सभक संपूर्ण परिवार हुनकर ओहि विचार केँ नकारि देलक आर दादी केँ फेर कहियो पूर्ण सफेद साड़ी नहि पहिरय देलक।