विराटनगर, ५ जनवरी २०१९. मैथिली जिन्दाबाद!!
नेपाल मे मैथिली लेखन मे युवा तुर केर कवि सब काफी अग्रसर छथि। जखन कि विद्यालय स्तर मे पढाई वास्ते ई विषय केर विकल्प रहितो शिक्षकक अभाव मे पढबाक अवस्था ओतेक नीक नहि अछि, तथापि मातृभाषा प्रति निजी स्नेह केर कारण लेखनी मे ई लोकनि काफी आगू रहैत छथि। एहने एक युवा तुर केर कविक नाम अछि ‘राम सोगारथ यादव’। आउ, देखी अपन कविताक माध्यम सँ कि सन्देश सम्प्रेषित करय चाहैत छथि।
१. खगता
सोचै छी मन सँ काछिक’ हटा दिती तोरा
फेर सोचैत छी
कछला पर हमरे मन घबाह हेत
हँ हमरा बुझल अछि
मनक घाउ
बेर-बेर पिजुवाक’ बेर-बेर
टिस दैत रहै छै ।
तखन एकटा नियार बनबैत छी ।
हम अपना मनमे रखबौ तँ
मुदा शून्य स्थान पर ।
फेर सँ नियार के नियारि के देखैत छी
तखन लगैय’
आब तोरा बिनु एकडेग नइ बढि सकैत छी हम
हँ
जदि तोरा छडैपक’ जँ
धाप लगबैत छी तैओ मात्र नउ धाप लगाबि सकैत छी
मुदा
हमरा जेबाक अछि
अनगिनती जीव के मन धैर
नपबाक अछि सभहक मनक गहिराई
आब अन्तिम बेर सोचैत छी
तोरा शुन्य स्थान पर रखला सँ
हम अपने शून्य सँ निचका स्थान पर गिर पडैत छी
तैं एक बेर आओर
अन्तिम नियार करै छी आ
हम अपना हृदयमे नेहक ताग सँ
खुटेस लैत छी तोरा
तब जा बुझ’मे अबैय हमरा
हमर खगता तों आ
तोहर खगता हम छी
२. युवा
नसा चढलै ऐहन जे जिया गेलै जिनगी
चिन्हा जानी कहाँ, ऐठन बैठन कत’
बिनु कागजे पतरके, दिया गेलै जिनगी
तोहर नइ मीत भ’ सकबौ
तोहर नइ प्रीत भ’ सकबौ
हम दोसर केँ शब्द रचना छी
तोहर नइ गीत भ’ सकबौ
हम चहुँदिस मिठास खोजै छी
तोरा लेल कोना, तित भ’ सकबौ
तोरे रचल खेलमे उलझल छी
हारि नइ तोहर जीत भ’ सकबौ
सोगरथा सहरजमिन भ’ गेल छौ
नइ टाट नइ तोहर भित भ’ सकबौ
