दिल्ली विश्व पुस्तक मेलामे पहिल बेर मैथिली, अपार भीड़ उमड़ल, स्टाल सं. ३८९, हौल संख्या १२-१२ए

प्रत्यक्षदर्शीक मुताबिक मैथिली मचान पर सब सँ अधिक भीड़ आइ पहिले दिन सँ चमत्कारक रूप मे देखल गेल। जाहि ठाम नैराश्यक कारी बादल लागल रहय, उम्मीद नहि कयल जाय जे लोक अपन भाषाक पोथी कीनिकय पढितो अछि – ताहि ठाम मैथिली मचान द्वारा कयल गेल ई अनुपम प्रयास सँ उम्मीद सँ बहुत बेसी समर्थन जुटबाक इतिहास बनैत देखा रहल अछि। अगल-बगल बहुते रास नामी-गिरामी प्रकाशक सभक स्टाल अछि, परञ्च भीड़ त सिर्फ आ सिर्फ मैथिली मचान पर, भेल न ई चमत्कार। बस अहाँ सभक सहयोग आ समर्थनक प्रभाव थिक ई। मैथिली जिन्दाबाद!! – नवारम्भ प्रकाशनक संचालक अजित आजाद अपन प्रतिक्रिया दैत कहलनि।

श्री आजाद विगत किछु समयसँ ई आह्वान करैत आबि रहला अछि जे जँ १००० आदमी १००० टका प्रति व्यक्तिक किताब कीन लैथ त ई एकटा विश्व रेकर्ड बनत जे सर्वाधिक पोथी मैथिली भाषाक बिक्री विश्व मेला मे भेल। आजुक सहभागितासँ बढल आत्मविश्वास संग श्री आजाद कहलैन जे विश्व रेकर्ड बनत से दृढ विश्वास अछि। बस अहाँ सब समूहगत ढंग सँ एहि विश्व पुस्तक मेला मे पहुँचू… शपथपूर्वक पोथी कीनू, पढू आ लिखबाक काज सेहो करू। प्रकाशन, बिक्री-वितरण आ चारूकात मैथिलीमय होयबाक कृपा स्वयं जानकीक कृपा सँ बरसैत रहत। गारन्टी!!

गैलरीक लौंग व्यु मे सबसँ अधिक भीड़ जतय देखि रहल छी वैह थिक स्टाल नंबर ३८९, अर्थात् मैथिली मचान।

आशा करी जे भीड़क संग-संग पोथीक बिक्री सेहो ऊफान पर अछि। ओना दिल्ली मे मिथिला जियत, ई जे कहबी कतहु-कतहु सुनि रहल छलहुँ से एहि प्रदर्शनी-बिक्री केन्द्र सँ सिद्ध होयत – दावी करैत कहैत छथि मैथिली साहित्य महासभाक वरिष्ठ पदाधिकारी संजीव सिन्हा।

एकटा जिज्ञासामे सिन्हा कहलनि जे उम्मीद टा नहि विश्वास करू – साहित्य अकादमी मे सूचीकृत कुल २४ गोट मान्यता प्राप्त भाषा मे हिन्दी आ अंग्रेजीक बाद सर्वाधिक बिक्री होयवला पोथी मैथिली थिक। मैथिलीक अच्छे दिन केँ कियो नहि रोकि सकैत अछि।

बहुत जल्द आरो कतेको रास खुशखबरी सुनेबाक बात सेहो ओ कहलनि जे समयक संग सूचित करब। एखन धरि दोसर मैथिली साहित्य महासभाक कोनो पदाधिकारीक तरफ सँ कोनो सूचना मैथिली जिन्दाबाद केँ प्राप्त नहि भेल अछि, लेकिन पदाधिकारी लोकनि पर ई भार त बनिते अछि जे मैथिली पोथीक बिक्री धमाधम आ उल्लेख्य करबैथ। मैथिली साहित्य महासभाक संस्थापक पक्षसँ हेमन्त झाक उपस्थिति आ समर्थन आह्लादकारी रहल।

बढय लागल अछि दिग्गज स्रष्टा लोकनिक उपस्थिति – पहुँचलाह अछि मैथिली नाट्य साहित्यक शेक्सपियर – महेन्द्र मलंगिया। संग मे छथिन सर्जक सपुत आ मैथिलीक झंडाकेँ कइएको आयोजनक माध्यम सँ दिल्लीक आकाशमे उच्च फहरेनिहार ऋषि झा मलंगिया।